Шрифт

14 мая.

Канон святому пророку Иеремие

Святого пророка Иеремии
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 2:

Проро́ка Твоего́ Иереми́и па́мять, Го́споди, пра́зднующе, те́м Тя́ мо́лим: спаси́ ду́ши на́ша.

Канон, глас 8.

Пе́снь 1.

Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Проро́че Бо́жий Иереми́е, моли́ Бо́га о нас.

Пре́жде твоего́ созда́ния проуве́денно из ма́терня чре́ва освяти́лся еси́ и язы́ком проро́к пома́зался еси́, взыва́я: Изба́вителю и Бо́гу на́шему пои́м.

Припев: Проро́че Бо́жий Иереми́е, моли́ Бо́га о нас.

Все́х ра́зум пре́жде прие́мый, твоея́ мы́сли движе́ния прозря́, о Иереми́е богоявле́нне, наста́вника тя́ лю́дем поставля́ет.

Сла́ва Отцу́ и Сы́ну и Свято́му Ду́ху:

Твоея́ мы́сли зри́тельное, му́дре, очи́стив от скве́рн плотски́х, и́стины свиде́тель показа́лся еси́, Творцу́ твоему́ превозлю́блен.

И ны́не и при́сно и во ве́ки веко́в. Ами́нь.

Богородичен: Всели́вшееся в Тя́ Сло́во Отчее, на земли́, Де́во Богоро́дице, па́че естества́ пло́тию ро́ждши, яви́лася еси́ тва́рей все́х Влады́чица.

Пе́снь 3.

Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

Припев: Проро́че Бо́жий Иереми́е, моли́ Бо́га о нас.

Ты́, освяти́в проро́ка Твоего́, Влады́ко, пе́рвее рождества́, и блудя́щим наста́вника посла́л еси́.

Припев: Проро́че Бо́жий Иереми́е, моли́ Бо́га о нас.

Благода́ть Ду́ха, все́льшаяся во устне́ твои́, я́коже пресве́тло свети́ло, су́щим во тме́ возсия́.

Сла́ва Отцу́ и Сы́ну и Свято́му Ду́ху:

Мира благово́ния твоего́ не терпя́щи, собо́р тя́ Изра́илев скве́рный в ро́ве затвори́.

И ны́не и при́сно и во ве́ки веко́в. Ами́нь.

Богородичен: Тобо́ю, Пречи́стая, Пресу́щественный Безнача́льный Сы́н Бо́жий спожи́ти челове́ком благоизво́ли.

Седа́лен, гла́с 8.

Приложи́ тебе́ у́хо Бо́г услы́шавати словеса́ Его́, богогла́сный проро́че. Те́мже, я́ко настоя́щая не су́щая, все́м уясни́л еси́, рыда́ньми же о лю́дех твои́х, уда́льшихся от Го́спода, пла́кал еси́. И ны́не сы́й на небесе́х, мо́лишися спасти́ся на́м.

Сла́ва, и ны́не, Богородичен:

В пучи́ну лю́таго впадо́х уны́ния, от мно́жества лука́вых и нечи́стых мои́х де́л приидо́х в недоуме́ние и отча́янием ны́не одержи́мь е́смь. Влады́чице Богоро́дице, Сама́ мя́ спаси́ благоутро́бием Твои́м: гре́шных бо Ты́ еси́ по́мощь и очище́ние спаси́тельное.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Проро́че Бо́жий Иереми́е, моли́ Бо́га о нас.

Пресве́тлое сия́ние Пресвята́го и Боже́ственнаго Ду́ха, се́рдце твое́ облиста́вшее, су́щим во тме́ просвеще́ние соде́ла.

Припев: Проро́че Бо́жий Иереми́е, моли́ Бо́га о нас.

Проро́ков спострада́тельнее все́х бы́в, всеблаже́нне богоприя́тне, ми́лости мя́ сподо́би, отча́яннаго мно́гими прегреше́ньми.

Сла́ва Отцу́ и Сы́ну и Свято́му Ду́ху:

Яко хода́тай бы́в явле́нным и боже́ственным сия́нием, хода́тайством твои́м умири́ многомяте́жнаго моего́ жития́ бу́рю.

И ны́не и при́сно и во ве́ки веко́в. Ами́нь.

Богородичен: Бо́га, Его́же родила́ еси́, Пречи́стая Де́во, Сего́ моли́ моли́твами Твои́ми дарова́ти согреше́ний проще́ние.

Пе́снь 5

Ирмос: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.

Припев: Проро́че Бо́жий Иереми́е, моли́ Бо́га о нас.

Якоже мо́лнию, проро́ка Твоего́ посла́л еси́, Иереми́ю освяще́ннаго, су́щим во тме́ све́та Тя́, Христе́, возвеща́юща.

Припев: Проро́че Бо́жий Иереми́е, моли́ Бо́га о нас.

Стрелу́ избра́нну, в ту́ле тя́ сокрове́нну, Иереми́е, проразуме́нием Свои́м тво́й Влады́ка, в ни́хже подоба́ше вре́менех, показа́.

Сла́ва Отцу́ и Сы́ну и Свято́му Ду́ху:

Уши чи́сте у́мнии име́я, сла́вне, бесе́дующу тебе́ Ду́ху сподо́бился еси́, проро́че, послу́шати.

И ны́не и при́сно и во ве́ки веко́в. Ами́нь.

Богородичен: Ве́лие и стра́шное Де́вы та́инство: и́бо я́вльшагося на земли́ Ею Бо́га челове́ком милосе́рдия ра́ди ма́терски воспита́.

Пе́снь 6.

Ирмос: Бе́здна грехо́в и прегреше́ний бу́ря мя́ смуща́ет и во глубину́ ну́жднаго ре́ет мя́ отча́яния, но Твою́ кре́пкую ру́ку мне́ простри́, я́ко Петро́ви, о Упра́вителю! и спаси́.

Припев: Проро́че Бо́жий Иереми́е, моли́ Бо́га о нас.

Привле́кл еси́ просвеще́ние и благода́ть бога́тно, богоно́се, духо́вно уста́ душе́вная разшири́в, и, испо́лнься, о́бщно все́м по́дал еси́, о проро́че, хотя́щим сия́ние.

Припев: Проро́че Бо́жий Иереми́е, моли́ Бо́га о нас.

Мо́ре мирско́е, возвыша́емое напа́стей треволне́нием, узре́в, после́дняя дворы́ возжела́л еси́, и исто́чник, реко́ю точа́щ сле́зы, люде́й твои́х злобы́тства го́рце рыда́ти.

Сла́ва Отцу́ и Сы́ну и Свято́му Ду́ху:

Сме́рть Изба́вителя предска́зовал еси́ та́йно, богогла́се: я́коже бо Агня, на дре́во Христа́ воздвиго́ша, живота́ Нача́льника, собо́р беззако́нный иуде́йский, Благоде́теля всея́ тва́ри.

И ны́не и при́сно и во ве́ки веко́в. Ами́нь.

Богородичен: Сло́во, е́же от Отца́ пре́жде ве́к ро́ждшееся безпло́тно, из Тебе́, Чи́стая, в ле́то пло́тски ражда́ется, и в се́ни Того́ вси́ поживе́м, я́коже дре́вле Иереми́я прорече́.

Конда́к, гла́с 3.

Очи́стив ду́хом, вели́кий проро́че и му́чениче, твое́ светоза́рное се́рдце, сла́вне Иереми́е, проро́чествия да́р свы́ше прия́л еси́ и возопи́л еси́ велегла́сно во страна́х: се́ Бо́г на́ш, и не приложи́тся и́н к Нему́, Иже, вопло́щся, на земли́ яви́лся е́сть.

Пе́снь 7.

Ирмос: Отроцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Припев: Проро́че Бо́жий Иереми́е, моли́ Бо́га о нас.

Ты́ ны́не не ктому́ в наде́ждах, но ве́щию, проро́че, прорече́нная, исполня́ема твоя́ зря́, взыва́еши: благослове́н еси́, Го́споди Бо́же, во ве́ки.

Припев: Проро́че Бо́жий Иереми́е, моли́ Бо́га о нас.

Орга́н боже́ственный яви́ся, ударя́емь руко́ю Уте́шителевою, небе́сныя гла́сы веща́я и поя́: благослове́н еси́, Го́споди Бо́же, во ве́ки.

Сла́ва Отцу́ и Сы́ну и Свято́му Ду́ху:

Рыда́ния спису́я, о проро́че, не помрачи́ боже́ственнаго весе́лия, его́же от мла́денства я́сно наслади́лся еси́, зовы́й: благослове́н еси́, Го́споди Бо́же, во ве́ки.

И ны́не и при́сно и во ве́ки веко́в. Ами́нь.

Богородичен: Во чре́во Де́вы вни́ти я́коже благоволи́л еси́, челове́ки хотя́ спасти́, проро́ки я́ве научи́вый чудеси́, благослове́н еси́, Го́споди Бо́же, во ве́ки.

Пе́снь 8.

Ирмос: Победи́тели мучи́теля и пла́мене благода́тию Твое́ю бы́вше, за́поведем Твои́м зело́ прилежа́ще, о́троцы вопия́ху: благослови́те, вся́ дела́ Госпо́дня, Го́спода.

Припев: Проро́че Бо́жий Иереми́е, моли́ Бо́га о нас.

На небеса́ возше́л еси́, веселя́ся, богодухнове́нне Иереми́е, и со безпло́тными престо́лу все́х Царя́ предстои́ши, — благослови́те, — поя́, — дела́, Го́спода и превозноси́те Его́ во ве́ки.

Припев: Проро́че Бо́жий Иереми́е, моли́ Бо́га о нас.

Благоче́стия пропове́дник бы́в, прехва́льне, освяще́н, и нече́стия обличи́л еси́ не́мощь, Иереми́е, — благослови́те, — поя́, — дела́, Го́спода и превозноси́те Его́ во ве́ки.

Сла́ва Отцу́ и Сы́ну и Свято́му Ду́ху:

Боже́ственныя зари́ све́том сия́я, облиста́ния лю́бящим посыла́еши, зерца́ло многосве́тло я́ко прии́м, — благослови́те, — вопия́, — вся́ дела́, Го́спода и превозноси́те Его́ во ве́ки.

И ны́не и при́сно и во ве́ки веко́в. Ами́нь.

Богородичен: Мое́ существо́ из Тебе́ восприя́т Животода́вец и пре́ждних скве́рн сие́ очи́сти, о Богома́ти! Его́же пое́м: благослови́те, вся́ дела́, Го́спода и превозноси́те Его́ во ве́ки.

Песнь 9

Ирмос: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Припев: Проро́че Бо́жий Иереми́е, моли́ Бо́га о нас.

Све́ту сраствори́вся пречи́стому, Божества́ зари́, блаже́нне сла́вне, его́же на земли́ явле́ния я́сно стяжа́л еси́.

Припев: Проро́че Бо́жий Иереми́е, моли́ Бо́га о нас.

Исто́чника нетле́ннаго доше́д, озаре́нии же сего́, богодухнове́нне, жела́емый тебе́ коне́ц я́ве получи́л еси́.

Сла́ва Отцу́ и Сы́ну и Свято́му Ду́ху:

Заре́ю светоно́сною, ея́же ны́не наслажда́ешися, воспева́ющих твою́ па́мять просвеща́ти, Иереми́е блаже́нне, все́х сподо́би.

И ны́не и при́сно и во ве́ки веко́в. Ами́нь.

Богородичен: Приста́нище спасе́ния, ве́рующии, Пречи́стому Твоему́ Рождеству́ све́дуще, от бе́д изба́витися Тя́ мо́лим.

Молитва

О прехва́льный и пречу́дный проро́че Бо́жий Иереми́е! Услы́ши нас, гре́шных и непотре́бных, в час сей предстоя́щих пред свято́ю твое́ю ико́ною и усе́рдно прибега́ющих к хода́тайству твоему́. Моли́ о нас Человеколю́бца Бо́га, да пода́ст нам дух покая́ния и сокруше́ния о гресе́х на́ших и всеси́льною свое́ю благода́тию да помо́жет нам оста́вити пути́ нече́стия, преспева́ти же во вся́ком де́ле бла́зе; да укрепи́т нас в борьбе́ со страстьми́ и похотьми́ на́шими; да всади́т в се́рдце на́ше дух смире́ния и кро́тости, дух братолю́бия и незло́бия, дух терпе́ния и целому́дрия, дух ре́вности к Сла́ве Бо́жией и спасе́нию бли́жних. Упраздни́ моли́твами твои́ми, проро́че, злы́я обы́чаи ми́ра, па́че же поги́бельный и тлетво́рный дух ве́ка сего́, заража́ющий христиа́нский род неуваже́нием к Боже́ственней правосла́вной ве́ре, к уста́вом Святы́я Це́ркве и к за́поведем Госпо́дним, непочте́нием к роди́телем и власте́м предержа́щим, и низверга́ющий люде́й в бе́здну нече́стия, развраще́ния и поги́бели. Отврати́ от нас, пречу́дне проро́че, предста́тельством твои́м пра́ведный гнев Бо́жий и изба́ви вся гра́ды и ве́си Оте́чества на́шего от бездо́ждия и гла́да, от стра́шных бурь и землетрясе́ний, от смертоно́сных язв и боле́зней, от наше́ствия враго́в и междоусо́бныя бра́ни. Укрепи́ твои́ми моли́твами, пресла́вне, предержа́щия вла́сти на́ша в вели́цем и многотру́днем по́двизе народоправле́ния, благопоспе́шествуй им во всех благи́х дея́ниих и начина́ниих к водворе́нию ми́ра и пра́вды в стране́ на́шей. Посо́бствуй христолюби́вому во́инству во бране́х со врага́ми на́шими. Испроси́, проро́че Бо́жий, от Го́спода па́стырем на́шим святу́ю ре́вность по Бо́зе, серде́чное попече́ние о спасе́нии пасо́мых, му́дрость во уче́нии и управле́нии, благоче́стие и кре́пость, во искуше́ниих, судия́м испроси́ нелицеприя́тие и безкоры́стие, правоту́ и сострада́ние к оби́димым, всем нача́льствующим попече́ние о подчине́нных, ми́лость и правосу́дие, подчине́нным же поко́рность и послуша́ние ко власте́м и усе́рдное исполне́ние свои́х обя́занностей; да та́ко в ми́ре и благоче́стии пожи́вше в сем ве́це, сподо́бимся прича́стия ве́чных благ в Ца́рствии Го́спода и Спа́са на́шего Иису́са Христа́, Ему́же подоба́ет честь и поклоне́ние со безнача́льным Его́ Отце́м и Пресвяты́м Ду́хом во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

Святого пророка Иеремии